Споменикот на Долард се распаѓа

Пред точно една година беше направен и откриен споменик во чест на холандскиот писател А. Ден Долард, во вид на стилизирано едро и со мермерна „книга“ на која беа исклесани името на познатиот автор и неговиот лик во профил. Иницијатори на убавата идеја беа туристичкиот работник од Охрид, Венко Мустракински и претставникот на холандската стопанска комора – „помакедончениот“ Питер Босе.

Добрата намера и фината промоција „ќе придонесеа“ за повторно доаѓање на холандските туристи во Охрид – место кое пред многу години им го претстави во своите книги писателот Долард.

Но, ништо од тоа. Холанѓаните не дојдоа во бројка која се очекува. Тие што дојдоа сигурно не сакаат да ја видат најновата руина во Охрид, а поминати се само триста пет-шеесет дена од откривањето на споменикот. Зараснат во трње, со одронат малтер (не можеме да процениме дали од удар или од слаб квалитет) и нечист. Споменикот пред извесно време беше и сквернавен (некои „таленти“ чкртаа на него), а сега само допропаѓа.

Штета би било да се доуништи оваа благородна идеја. Споменикот е на убаво место и веројатно не требаат многу средства за одржување. Треба само волја.