Безбедносната состојба на подрачјето во 2023 година е поволна, без индиции да биде нарушена, а благодарение на раното детектирање на новите трендови и закани се олеснува превенцијата и борбата против криминалните појави, рече министерот за внатрешни работи Оливер Спасовски по посетата на Регионалниот центар за гранични работи Запад во Охрид, каде што оствари работна средба со раководствата на СВР Охрид, СВР Битола и РЦГР Запад.
РЦ Запад бележи зголемен проток на патници на граничните премини за 11% споредбено со 2022 година, при што на овие гранични премини влез и излез оствариле 3,4 милиони патници, a на Граничниот премин Ќафасан функционира режимот One Stop Control на проток на патници. Зголемување за 47 % е евидентирано и на бројот на странци со краткотраен престој, а што се однесува до илегалната миграција тенденцијата е иста како во генерални рамки, при што се бележи намалување на обиди за илегални преминување на нашата граница, како резултат на мерките и активностите кои се преземаат на терен и добрата поставеност на нашите служби. За одбележување се и контролните активности на Полициската станица за граничен надзор Охридско Езеро, каде периодов беа пронајдени 620 мрежи со 337 кг уловена риба, истакна министерот Спасовски.
Што се однесува до резултатите на СВР Охрид за 2023 година споредбено со 2022 година, Спасовски истакна дека во истиот овој период, СВР Охрид бележи намалување на криминалитетот за 18.8%, додека ефикасноста во расчистување на кривичните дела со непознат сторител изнесува 44%.
Економскиот криминал бележи намалување од над 11 % на ниво на овој сектор, додека во делот на недозволена трговија со дрога во текот на оваа година поднесени се 133 кривични пријави, а динамиката на откривање и спречување е посебно нагласена во последната половина година, кога е реализирана заплена на наркотична дрога во 78 наврати, додаде Спасовски, со уверување дека вработените во овие две организациони единици ќе продолжат со несмален интензитет да бележат позитивни резултати во гарантирањето на безбедноста.
Воедно, во пресрет на претстојните празници и очекуваното зголемено присуство на граѓани во туристичките подрачја, министерот Спасовски посочи на уште позајакнати мерки и активности со цел одржување на поволен јавен ред и мир и високо ниво на безбедност.
OhridNews
