Одлуката на градските власти за забрана за издавање и употреба на педалинки на струшката ривиера директно ќе ја загрози егзистенцијата на една ранлива категорија граѓани, велат сопствениците на педалинки од Струшко.
-Моите ќерки ми купија три педалинки кои ги издавам, за да имам за живот и лекови. Апелирам до градоначалникот Мерко и владата да размислат и да помогнат да се реши проблемот. – вели Мимоза Мојсоска, сопственичка на педалинки.
Сопствениците на педалинки во Струга, бараат градските власти да ја преиспитаат одлуката за забрана за користење на овие реквизити за рекреација, посочувајќи дека таа е донесена без поширока јавна расправа.
– Ниту еден претставник на издавачи на педалинки не беше повикан на седницата на советот на која беше донесена одлуката за забрана. Аргументите поради кои таа беше донесена исто така не држат. Многу повеќе луѓе ги губат животите во сообраќајни несреќи, зошто тогаш не ги забранат автомобилите? – прашува Бојан Божиноски, сопственик на педалинки.
– Давеници имало и ќе има, но не може за сите жртви одговорноста да се сведе на педалинките. Давеници има и во Дримот каде нема педалинки. – истакнува Ненад Бучески.
Доколку советот не ја промени одлуката за забрана, сопствениците на педалинки во Струга најавија дека правдата ќе ја бараат на суд. Во меѓувреме тие покренаа петиција која ќе биде доставена на надлежните институции.
Г.М.
