Извршители придружувани од надлежен инспектор и полициска асистенција, утрово ја продолжија акцијата за отстранување на урбана опрема, шанкови и објекти од плажите во Св. Стефан, што се спроведува по налог на Општина Охрид.
И покрај инсистирање на еден од сопствениците дека сам ќе ја отстрани опремата на плажата „Метрополис“ во близина на хотелите „Бетон“ и „Силекс“, акцијата не беше запрена. Овластениот инспектор рече дека постапува согласно налогот добиен од општината, а работниците од ангажираната фирма почнаа со отстранување на шанкот и другата опрема.
Од дистанца акцијата ја следеа сопствениците на ближните угостителски објекти и шанкови. Се пожалија дека властите немаат слух за нивните проблеми и дека уривањето во состојба на криза, непосредно пред сезоната, ќе има несогледливи последици за нив, но и за туризмот.
Сопствениците на шанкови и урбана опрема во Св. Стефан велат дека добиле само известување, но не и решение за отстранување на урбаната опрема. Повторно обвинија за селективност, посочувајќи дека на потегот од Горица 3 до Застава има огромни цврсти градби, потпорни ѕдови дури и базени, кои, како што рекоа тие, незаконски се изградени, но нив никој не ги чепка.
Општина Охрид информираше дека се преземаат активности за отстранување на урбаната опрема и остатоците од објекти кои се лоцирани на крајбрежјето на Охридското Езеро, на потегот од „Горица 3“ до ЈЗУ Специјализирана болница за превенција, лекување и рехабилитација на кардиоваскуларни заболувања во населбата „Свети Стефан“.
Се работи за урбана опрема и градби кои се надвор од опфатот на Генералниот урбанистички план. По завршувањето на активностите за отстранување на овој потег од крајбрежјето, ќе се пристапи кон отстранување и на останатите објекти, потпорни ѕидови, шанкови, метални конструкции и настрешници, кои исто така се надвор од опфатот на Генералниот урбанистички план и навлегуваат во КП 1/1 Охридско Езеро. – појаснуваат од локалната самоуправа.
Објектите кои се наоѓаат во опфатот на Генералниот урбанистички план ќе бидат решавани со изготвување на Урбанистичко-планска документација за крајбрежје, согласно Планот за управување со природното и културното наследство на Охридскиот регион, информира Општина Охрид.
Г.М.
