Снегот го отежна сообраќајот на дел од патните правци низ земјава

Сообраќајот на сите магистрални и регионални патни правци низ државата се одвива без забрани, но отежнато по влажни и лизгави коловози претежно поради врнежи од дожд.

Поради интензивни врнежи од снег одвивањето на сообраќајот е отежнато на патните правци Тетово – Попова Шапка, Гостивар – Стража и Гостивар – Маврово. Од Авто- мото сојузот на Македонија им препорачуваат на возачите да возат внимателно, со прилагодување на брзината на движење по влажните и лизгави коловози и почитување на поставената сообраќајна сигнализација.

Крајна внимателност, прилагодена брзина и одржување на потребното растојание помеѓу возилата, се препорачува на патните правци низ клисурите и планинските превои, каде е почеста појавата на поситни одрони. Ова особено се однесува за патните правци Катланово – Велес, Демир Капија – Удово и Маврово – Дебар – Струга.