Канадскиот натпреварувач во скијачко трчање Брајан Мекивер (30) ќе влезе во историјата како прв спортист кој истата година ќе настапува на Зимските олимписки и параолимписки игри, јави МИА.

Мекивер има Старгартова болест, многу ретка болест на очите, поради која има само 10 отсто вид и тоа само периферен. Cепак тоа не го спречи да ја исполни олимписката норма и вчера и официјално беше вклучен во репрезентацијата, која следниот месец ќе настапи на Олимписките игри во Ванкувер. По тоа, во истиот град го очекува и настапот на Параолимписките игри.

Мекивер до место во тимот дојде со победа во 50-километарската квалификациска трка минатиот месец. Видот го загубил како 19 годишно момче, а од тогаш настапи на параолимписките игри во 2002 и 2006 година, во скијачко трчање и во биатлон. Освои дури седум медали, а водач му беше неговиот брат Робин, кој нема да може да му помага следниот месец на премиерниот настап на Олимписките игри.

Ohridnews