Неколку скутерџии вчера на плажата кај хотел Гранит со часови ги вознемируваа гостите и капачите. Возејќи со огромна брзина на само неколку метри од брегот , буквално ги принудија капачите да излезат од вода стравувајќи дека нивната безбедност е загрозена. На капачите и бројните гости не им преостана ништо друго освен од копно да ги следат меѓусебните трки кои со огромна брзина ги правеа скутерџиите.
Револтираните гости коментираа дека иако заврши ограничувањето на пловидба на скутери која траеше од 20 јули до 20 август, тоа не им дава за право на скутерџиите да прават што сакаат и да ги малтретираат туристите кои дошле да се релаксираат на плажа.
Од охридската Капетанија информираат дека продолжуваат секојдневните контроли од нивна страна и ќе се казнуваат сите несовесни скутерџии кои ја загрозуваат безбедноста на капачите. Сепак, признават дека поради ограниченост на средствата со кои тие располагааат, невозможно е да се врши контрола на целата површина од езерото и при тоа да се казнуваат сите кои не ги почитуваат правилата за пловење.
Според нивните податоци, во периодот додека траеше ограничувањето на пловидбата на скутери, поднесени биле осум пријави за непочитување на ограничувањето, а биле извршени контроли врз вкупно 106 пловни објекти.
Ohridnews
