– Хрватскиот модел на работа во репрезентацијата ќе биде мојот пример, вели кандидатот за селектор на македонската фудбалска селекција Артим Шаќири
Поранешниот македонски репрезентативец влезе во потесниот избор за селектор по отказот на Мирсад Јонуз, кој управниот одбор на Фудбалската федерација на Македонија му го врачи пред две недели. Тој во петокот беше на разговор во ФФМ, заедно со новиот тренер на Вардар, Илчо Ѓорѓиоски.
– Задоволен сум од разговорот што го имав со претседателот на федерацијата Харалампие Хаџиристески. Доколку го добијам мандатот, мојата примарна цел ќе биде да ги вратам нарушената атмосфера и дисциплината во „црвено-жолтиот“ состав, работи кои во голема мера беа нарушени со претходниот селектор – вели Шаќири.
Поранешниот капитен на Македонија (75 натпревари, 15 гола) секогаш го давал максимумот во натпреварите во дресот со националниот грб. Стружанецот истото ќе го бара и од неговите избраници.
– Секој што ќе се одзива на повикот во националниот тим, ќе мора да го дава максимумот, подеднакво исто како што тоа го прави за клубот во кој настапува – истакна Шакири.
Тенкиот буџет на федерацијата, смета дека македонските селектори ги става во пол-позиција пред странските решенија. Како играч минал многу, бил под водство и на македонски и на странски селектори и смета дека тактичките варијанти го прават еден селектор добар или лош.
Имињата на евентуалните соработници во стручниот штаб не сака да ги открие, но вели дека доколку ја добие довербата, тоа ќе биде тим составен од поранешни соиграчи од репрезентацијата.
– Ќе го имплементирам хрватскиот модел. Видовте што направи Славен Билиќ со селекцијата и кои се луѓето што работат во неговиот тим. Сметам дека и ние имаме таков потенцијал – вели Шаќири.
Одлуката кој ќе биде новиот македонски селектор се очекува да биде донесена кон средината на Јули.
М.П.
