Од 27 јули до 1 август во Барселона (Шпанија) ќе се одржи 20-то издание на Европското Првенство во атлетика за сениори-ки.
На ова првенство Атлетската федерација на Македонија ги испрати моментално најдобрите атлетичари, а тоа се Ивана Рожман која ќе настапи на 100 метри и Реџеп Селман кој ќе настапи во трискок, со нив за Барцелона замина и тренерот Влатко Димитров.
Прв на првенството ќе настапи Реџеп Селман во квалификациите во трискок кои на програмата се на 27 јули (вторник) во 20.20 часот. Најдобриот резултат на Селман оваа сезона е 15.39 метри, додека неговиот личен рекорд изнесува 15.46 метри којвоедно е и македонски рекорд во оваа дисциплина.
Ивана Рожман својот настап во квалификациите на 100 метри ќе го има на 28 јули (среда) со почеток во 10.40 часот. Најдобриот резултат на Рожман оваа сезона е 12.44 секунди, додека нејзиниот личен рекорд изнесува 12.07 секунди.
На ЕП во Барселона ќе учествуваат 1.370 атлетичари-ки од 50 земји што представува рекордна бројка. На последното ЕП, во Гетеборг, учествуваа 1.288 атлетичари-ки од 48 земји.
Свеченото отварање на првенството ќе се случи на 26 јули во вечерните часови на еден од плоштадите во Барселона.
Ohridnews
