Со погодокот на Алексaндар Атанасов во финишот на мечот против Македонија ЃП, битолски Пелистер победи со 1-0 и направи голем чекор кон враќање во елитата. По само една година мината во второлигашкото друштво , “пелистерци“ се многу блиску во враќање во својата природна средина.

– Тежок натпревар, се играше во два напладне, на тешки 30 степени. Постигнавме погодок во 90 минута, како плод на нашата дисциплинирана игра. Со овој триумф големиот дел од работата е завршена, остануваат само детали , но опуштање не смее да има – рече за ohridnews Марјан Секуловски, тренерот на Пелистер.

Битолчани во послените пет рунди, три пати играат на домашен терен, против Охрид Лоте, Миравци и Дрита во последната рунда, додека гостуваат кај Еуромилк и Гостивар.

– Со победата во Скопје, вратите се широко отоворени, во фудбалот се е` можно, но но не верувам дека ќе ја прокоцкаме оваа шанса. Посакуваме мечот од последната рунда против Дрита да биде една голема “зелена“ фешта –  вели Секуловски, кој од доаѓањето на клупата на Пелистер има 13 победи, 3 ремија и само еден пораз.

Нема големи тајни во успехот на битолчани, напорната работа ги дава посакуваните резултати.  – Работа, работа и само работа – завршува Секуловски.

М.П.