Деновиве стапија во сила измените на Законот за јавни патишта со кои се укинува наплатата на надоместокот за патна такса за возилата регистрирани надвор од Република Македонија. Со овие измени се врши хармонизација на Законот за јавни патишта со европското законодавство, со која се утврдува дека при користење на една патна делница не смеат да се наплатуваат и патарини и патни такси истовремено, информираат од Министерството за транспорт и врски.
Домашните превозници оваа такса ја плаќаат при регистрација на тешките товарни возила во Република Македонија. Таа такса се уплатува за користење на делот од патната инфраструктурата на која не се наплаќа патарина во Република Македонија. Целта на оваа давачка, е одржување и реконструкција на патишта на кои не се наплаќа патарина и истата е приход на Агенцијата за државни патишта и се користи за таа намена. Странските превозници во своите матични држави при регистрација на возилата, исто така плаќаат давачки кои се користат за користење на делот од патната инфраструктура во сопствената држава. Додека на странските товарни возила може да им наплаќа само за користење на оние делови од патната инфраструктура кои имаат карактеристики на автопат, истото важи и за нашите превозници кога возат во странство – им се наплаќа само за користење на оној дел од патната инфраструктура кој има карактеристики на автопат, објаснуваат од Министерство за транспорт и врски.
