Со несмален интензитет продолжува акцијата за отстранување на урбана опрема, конструкции, ѕидови, шанкови и објекти на плажите на Охридското крајбрежје, кои се надвор од опфатот на Генералниот урбанистички план, што ја спроведува општината согласно уредбата на владата и Планот за управување со Охридскиот регион кој произлегува од барањата на УНЕСКО за заштита на универзалните вредности на единственото подрачје во нашата земја кое е прогласено за светско културно и природно наследство.

И натаму се работи на потегот од Горица 3 до Св. Стефан, а од денеска акцијата е проширена и на потегот од Св. Стефан до Елешец. Концесионерите кои имаат урбана опрема и објекти на овој простор, а чии договори се истечени, добиле известување од локалната самоуправа да ги отстранат истите. Дел од нив почнаа сами да ги демонтираат платформите, цврстите подлоги и објектите од плажите, но се жалат дека рокот кој им бил даден е краток.

Љупчо Нечкоски, концесионер на плажата „Акапулко“ вели дека неговата плажа не отстапува од проектите на надлежните институции и ги има платено сите концесии од 2007 година, кога почнала да работи.

Добивме известување вчера до денес да ја отстраниме опремата. Дали е возможно за 24 часа да се исчисти простор од 4500 метри квадратни? – праша Нечкоски. Тој бара од надлежните и одговор што ќе биде со плажите од кои се отстранува опремата и дали истите во иднина ќе бидат предмет на некакво издавање, изразувајќи сомневање дека можеби целта е да ги земе некој друг.

Општина Охрид ги отфрла ваквите обвинувања. Ги потсетува концесионерите на донесениот План за управување со Охридскиот регион, согласно кој во иднина ќе се уредува крајбрежниот простор кој е во опфат на ГУП-от, за што треба да бидат донесени соодветни акти кои произлегуваат од него.

Просторот ќе се уредува со изготвување на Урбанистичко-планска документација за крајбрежјето, согласно Планот за управување со природното и културното наследство на Охридскиот регион, појаснуваат од локалната самоуправа, посочувајќи дека плажите на кои сега се постапува се надвор од опфатот на Генералниот урбанистички план.

OhridNews