Културната манифестација „Прличеви беседи“ со која традиционално се одбележува годишнината од смртта на Вториот Хомер, годинава ќе понуди бројни содржини, со кои според организаторот, Центарот за култура „Григор Прличев“, достојно ќе му биде оддадена почит на големиот поет и преродбеник.
И оваа година националната установа манифестацијата што традиционално се одржува на 5. и 6. февруари ја организира во соработка со Редакцијата ,,Детска радост” – Друштвото на писателите на Македонија и други установи и институции од градот.
– Со оглед на значењето и димензијата на оваа најстара културна манифестација во Охрид, која се организира од 1952 година, во интерес е ова големо име од залезот на вториот милениум, во чест на традициите, а во завет на генерациите што доаѓаат по нас перманентно да биде одбележувано на соодветен начин и со посебен пиетет, велат од Центарот за култура чиј патрон е Григор Прличев.
Манифестацијата „Прличеви беседи“ е поддржана од Министерството за култура на Република Македонија.
Ohridnews
