По силните поплаки на граѓаните од околните згради и барања за дислокација на Дневниот центар за зависници од дрога, локалната и централната власт најавија дека сериозно ќе го разгледаат проблемот и ќе се обидат да изнајдат решение.
Министерот за труд и социјална политика Џелаљ Бајрами, кој вчера беше во работна посета на Охрид, смета дека зависниците од дрога не треба да се гетоизираат туку треба да се социјализираат.
Со ова се согласува и градоначалникот Петрески, кој укажува дека треба во предвид да се земат и мислењата на граѓаните кои се жалат на расфрлани шприцеви во околината на дневниот центар за зависници од дрога.
– Ќе разговараме со министерот да изнајдеме решение кое ќе ги задоволи потребите на зависниците, но и граѓаните. Треба да се осмисли добро цалата работа затоа што во дневниот центар за зависници од дрога кој е отворен пред само неколку години се вложени големи средства. Било каде да се дислоцира центарот ќе има реакции од граѓаните, а сигурно не е цел зависниците да не доаѓаат во контакт со граѓаните. Мислам дека може да се најде решение на обострано задоволство, изјави градоначалникот Петрески.
Во Охрид се регистрирани околу 400 зависници од дрога, но според експертите црната бројка на уживатели на дрога е многу поголема.
