Садам Хусеин е мртов. Бившиот претседател на Ирак беше погубен со бесење околу 6 часот наутро по локално време. Погубувањето се изврши во Министерството за правда, северен Багдад. Бившиот диктатор одлуката за негово бесење ја дознал во својата ќелија кога му бил врачен црвен картон – систем кој бил воведен за време на неговото владеење, измислен од него самиот.
Според ирачката влада, телото на Хусеин ќе биде закопано на тајна локација. Неговата смрт најверојатно нема да има влијание врз отежнување на ионака тешката ситуација во Ирак.
Погубувањето било снимено на филмска лента (заради историски цели) но нема да биде прикажано јавно. Слики од мртвото тело најверојатно ќе бидат прикажани.

Во 1982 Хусеин преживеал обид за атентат во Дуџаил, голем шиитски град јужно од Багдад. Подоцна им наредил на своите сили да го нападнат градот, а 148 луѓе биле погубени. Во 1990 Садам наредил инвазија на Кувајт, по што следеше операцијата Пустинска Луња и Првата Заливска војна. Ирачките трупи беа исфрлени, но Садам преживеа. Во 2003 коалициони сили го нападнаа Ирак, Хусеин побегна, за да биде пронајден неколку месеци подоцна скриен во дупка. Американските војници го предадоа на ирачките власти кои свикаа цивилен трибунал. На 5-ти ноември оваа година беше осуден на смрт, пресуда извршена утринава.

извор:
euronews