Фудбалерот на Манчестер Сити и шпанската репрезентација Родри ја освои Златната топка што ја доделува францускиот спортски весник Франс Фудбал. Наградата на церемонија што се одржа во Париз му ја врачи легендарниот либериски центарфор Жорж Веа.
Шпанскиот играч за врска доби најмногу гласови во конкуренција во која, меѓу другите, беа и Винисиус Јуниор, Џуд Белингем, Лаутаро Мартинез, Килијан Мбапе и Ерлинг Халанд. Тој минатата сезона ја освои Премиер лигата и ја предводеше Шпанија до титулата Европски првак. Родри на бината се искачи на патерици поради повредата на коленото што ја заработи на почетокот од сезоната.
На свеченоста не присуствуваше ниту еден претставник на Реал Мадрид каде очигледно се многу се лути на Франс фудбал поради тоа што освојувачот на Златната топка не е од редовите на шпанскиот и европскиот шампион и покрај тоа што признаниуето за најдобар тренер отиде во рацете на Карло Анчелоти кој не ја прими наградата.
Ламин Јамал, 17-годишниот фудбалер на Барселона го освои трофејот за најдобар млад играч во светот. Хари Кејн од Баерн Минхен и Килијан Мбапе од Реал Мадрид (екс ПСЖ) го добија трофејот Герд Милер за најдобри стрелци минатата сезона. Хари Кејн го прими трофејот на сцената, додека Мбапе не дојде на церемонијата.
За најдобар тренер во женска конкуренција прогласена е Ема Хејс, актуелната селекторка на американската женска репрезентација која го предводеше седукратниот првак на Англија Челзи.
Емилијано Мартинез, голманот на Аргентина и Астон Вила вторпат по ред го освои трофејот Лав Јашин за најдобар голман. Исто така, ѕвездата на Барселона Аитана Бонмати вторпат по ред ја освои титулата најдобар женски играч. Шпанската интернационалка Џенифер Хермосо го освои трофејот Сократес, за посебен придонес во општеството.
Сите награди:
Најдобар играч: Родри
Најдобар играч: Ајтана Бонмати
Најдобар тренер: Карло Анчелоти
Најдобар тренер: Ема Хејс
Најдобар млад играч: Ламин Јамал
Најдобри стрелци: Хари Кејн и Килијан Мбапе
Трофеј Сократес: Џенифер Хермосо
Најдобар машки клуб: Реал Мадрид
Најдобар женски клуб: Барселона
Г.М.
