Управата на Ракометниот клуб Охрид со забрзано темпо го пополнува играчкиот ростер пред почетокот на подготовките за новата сезона во Супер лигата. Нови членови на охридскиот клуб се бековите Борче Соколов, Лазар Петровиќ и голманот Јагош Брауновиќ.
За искусниот Соколов ова ќе биде кам бек во Охрид, каде што мина две сезони, додека 19-годишниот Петровиќ кој игра на десната бековска позиција потпиша двегодишен договор, а Брауновиќ ќе биде второто засилување на голот после Мартин Јовановски.
Претходно, верноста со „гладијаторите“ ја продолжија Крсте Андоновски, Иван Тасески, Бобан Блажески и Славиша Димитријески, а ново име ќе биде Златко Везенковски.
Подготовките за новата, вкупно шеста сезона во елитата охридските ракометари ќе ги започнат на 8 август. Низ подготвителниот период охриѓани ќе одиграат неколку контролни натпревари, а не се исклучува можноста за спаринг средба со некој од грчките клубови.
OhridNews
