Доделувањето на наградата ќе биде на 47-те Струшки вечери на поезијата, на свеченост во Домот на браќата Миладиновци во Струга. Наградената книга преведена на англиски јазик ќе биде промовирана на наредното фестивалско издание. „Среде“ е завршен дел на неговата поетска трилогија во чиј состав се и стихозбирките „Ненадејна“ и „Чехопек“.
Ристо Лазаров
Одлуката за доделување на оваа награда токму на Ристо Лазаров ја донесе тричлено жири, во состав Санде Стојчевски, претседател, и Наташа Аврамовска и Џабир Ахмети, членови. На конкурсот за наградата „Браќа Миладиновци“ пристигнале 21 ракопис. Покрај книгата на Лазаров, во најтесен избор била и стихозбирката „Мојот Пикасо“ од Виолета Танчева-Златева. Во образложението зошто престижната награда му е доделена на Ристо Лазаров, претседателот на жирито Санде Стојчевски рече:
„ Со оваа книга Лазаров го достигнува својот творечки зенит, збогатувајќи ја современата македонска литература со специфично и сложено лирско дело. Книгата „Среде“ е наградена поради спомнатите карактеристики, како и за уште голем број својства и квалитети што таа ги содржи, а кои сугурни сме ќе ги регистрира и ќе ги коментира книжевната критика“.
Струшките вечери на поезијата годинава ќе се одржат од 21 до 24 август. На фестивалот ќе учествуваат 82 поети од 52 земји во светот.
