Репортажа: „Скребатно-скриениот рај“

31.03.08 00:03

Во охридскиот крај има многу прекрасни места за кои знаат релативно малку луѓе. Едно такво е и Скребатно. До селото се доаѓа по патот кој минува низ селото Лескоец, а потоа продолжува низ планината поминувајќи низ прекрасен крајолик. Покрај патот кој минува крај река ќе видите прекрасни водопади и слапови. Ќе видите и варници каде локалното население на традиционален начин произведува вар.

^{прекрасен крајолик и автентични занаети}

По околу девет километри возење од Лескоец се доаѓа до селото Скребатно. Од некогашното село останати се напуштени куќи, а само мал дел се обновени и таму сега живеат само неколку жители.Најголемиот дел од жителите се преселени во Лескоец.

^{Најголемиот број куќи во Скребатно се напуштени}

Над селото се наоѓа црквата „Успение на Пресвета Богородица“. Околу црквата уредено е прекрасно излетничко место кое како и црквата изградено е со донации и доброволна работа на вредните скребаштани кои не го заборавиле своето родно место. Напротив, тие секој викенд доаѓаат и го чистат просторот, градат, поправаат.

^{Црквата Успение на Пресвета Богородица}

Самото место изобилува со вода, многубројни изворчиња, потоци и реки. Сето тоа убаво е средено, направена е чешма и базени кои се порибени со охридска пастрмка. Околу се поставени маси и клупи, изѕидани фурни каде можете да испечете скара или да направите ѓомлезе.

^{водата во Скребатно ја има во изобилство}

^{во базените охридска пастрмка

сач за ѓомлезе или клен како во случајов}

Посебно внимание е посветено на хигиената, па на секој чекор има поставено корпи за отпадоци и натписи да се чува околината.

^{излетничкото место е беспрекорно уредено}

Со црквата и целиот комплекс управува црковен одбор избран од селаните. Црковниот одбор посебно е ангажиран за празникот на црквата кој е на 28 август на денот на Голема Богородица. Тогаш луѓе од сите краишта го посетуваат ова место, доаѓаат и со шатори да преспијат. За овој ден се организира голема општонародна веселба, се колат јагниња, се дава ручек за сите посетители. Но и по празникот ова место продолжува да живее сред недопрената природа за да одново биде откриено од некои нови посетители.

^{спортски терени

недопрена убавина}