Во текот на последните 24 часа на Клиниката за инфективни болести во Скопје се хоспитализирани 10 нови пациенти, додека на инфективното одделение во Воената болница се згрижени четворица пациенти, сомнителни за инфлуенца А (Х1Н1), соопшти Министерството за здравство.
Новопримените пациенти се во стабилна здравствена состојба, освен еден 25 годишен пациент со бронхопневмонија, кој е во потешка општа состојба и со респираторна слабост. Во општа тешка состојба, но со стабилни витални параметри е 44-годишна пациентка, која пред три дена е хоспитализирана на клиниката.Непроменета е состојбата и на 55 годишната пациентка примена на 18, овој месец, која и понатаму е во изразито тешка состојба, се наоѓа на вештачка вентилација, но со стабилни витални параметри.
Во моментот на Клиниката се хоспитализирани вкупно 83 болни, а на инфективното одделение се лекуваат дваесетина пациенти. Сите добиваат соодветна терапија и освен тројцата пациенти со потешка општа состојба, сите други хоспитализирани се стабилни и нивната здравствена состојба се подобрува, информираат од Министерството за здравство.
