Ѕвездениот тим на Парис Сен Жермен доживеа елиминација во осминафиналето од Лигата на шампионите од Баерн Минхен. Баварците беа подобри и во реваншот на домашен терен совладувајќи го ПСЖ со 2:0 и со вкупен резултат од 3:0 се пласираа во четвртфиналето.
Парижаните втора година по ред не успеваат да ја поминат оваа фаза во елитното фудбалско натпреварување.
Не можевме да го отвориме резултатот кога добивме шанса. Одигравме добро во првото полувреме, чувствувавме дека можеме да постигнеме гол, но не ги искористивме нашите шанси за гол. На ова ниво, не можете да пропуштите такви шанси. Да, Баерн притискаше, но понекогаш треба само да ја шутнете топката подалеку за да се справите со притисокот. Не треба да се срамите од тоа. После еден час игра тие поведоа и стана многу тешко да се надомести нивната предност, изјави по мечот тренерот на ПСЖ Галтие.
Во четвртфиналето е и Милан кој одигра нерешено без голови со Тотенхем во Лондон, со што успеа да ја задржи минималната преднос од 1:0 остварена во првиот натпревар.
Претходно пласман во четвртфиналето остварија Челзи и Бенфика.
Лигата на шампиони продолжува следната недела со преостанатите реванш средби од осминафиналето.
Г.М.
