Ви упатуваме јасен повик и да знаете плати поголеми уште утре согласно Законот за минимална плата кој предвидува скалесто зголемување на сите останати плати, порача претседателот на Сојузот на синдикатите на Македонија (ССМ), Дарко Димовски од денешниот првомајски протест, упатувајќи ги уште еднаш барањата – линеарно зголемување од 2.806 денари на сите плати во државата и повлекување на претставката за недела неработен ден од Уставниот суд.
Како што истакна Димовски, овие барања треба да се исполнат што поскоро.
Зголемувањето на платите да се случи ден побрзо зашто економската криза не изеде, ја изеде платата на работникот, инфлацијата е се поголема и тие пари ни се се понеопходни. Да ве предупредиме, да ја повлечете претставката за недела неработен ден зашто тоа е реланост во земјава – работникот го користи тој бенефит – одмора. Не може, работодавачи и газди, да ви бидеме робови седум дена во неделата, напомена претседателот на ССМ во кусото обраќање пред Стопанската комора.
Протестот почна пред зградата на ССМ, а ќе заврши пред Владата од каде, како што соопшти Димовски, ќе бидат испратени уште вакви јасни и гласни пораки.
Ќе се собереме, ќе блокираме се и многу лесно овој протест ќе прерасне во штрајк, а тоа значи прекин на работата за време на работното време. Ако ние трпиме штета и вие ќе трпите штета, рече Димовски.
„Без пари нема работа“, „Зголемување на плата 2 806 денари веднаш за сите“, „Без лихвари, газди и банкари можеме, без работници не можеме“, „Договори за вработување на неопределено време“, „Стоп за мобинг“, се само некои од пораките што може да се забележат на протестот.
OhridNews
