Македонскиот триатлон доживеа голем успех на Балканското триатлон првенство во кадетска категорија, што викендов се одржа во Изворани, Романија.
Петнаесетгодишниот Јосиф Малински освои прво место во балканска конкуренција и второ во апсолутна, а една година помладиот Марио Брезовски беше втор во балканска конкуренција и трет во апсолутна.
И двајцата се членови на скопскиот ТК „Триоги рејсинг“.
Ова е голем успех за нашите триатлонци. Работиме напорно, се трудиме да го донесеме триатлонот рамо до рамо барем со балканските земји, гледајќи перспективно и подалеку. Патот не е едноставен, ресурсите се многу ограничени, но ентузијазмот е тој што не држи на оваа патека. Имаме генерации младинци што можат многу да постигнат, ние, а и државата треба да им помогнеме да го остварат тоа, вели Данчо Ѓорѓијевски, селектор на триатлон репрезентацијата и основач на клубот „Триоги рејсинг“.
За македонската репрезентација на Балканското првенство настапија и: Бобан Јаневски, Филип Здравев, Варвара Атанасовска (Триоги рејсинг – Скопје) Матео Мачоски и Тија Кукунешоска (3Disciplines од Струга) и Стефан Делев (ТК „Софка“).
OhridNews
