Лебот наш насушен… Преку леб погача… Добар како лепче… Лебот е наше секојдневие, основна храна на луѓето со милениуми. Црн, бел, полубел, интергален, диетален, од рж, од јачмен, од пченкарно брашно, од пченично брашно, селски, ролуван, плехче, багет, со семки, со квасец и бесквасен, со и без адитиви, човековата инвентивност кога станува збор за лебот е бескрајна. Како што секоја почва раѓа различно зрно, така секоја култура има свој специфичен леб. Производители на леб во Македонија, но и индивидуални лица, ќе земат учество на првото издание на Фестивалот на лебот, што ќе се одржи денеска во ресторанот „Ореов лад“ во Скопје. Организатори на манифестацијата се Балканија – Балканска асоцијација за Алтернативен туризам АППТРМ – Агенција за подршка и промоција на туризмот на Македонија , Ресторан Ореов Лад и НВО – Вршник подржани од Фондацијата на Есма и Стево Теодосиевски.
Фестивалот на лебот ќе ги презентира лебовите карактеристични за различните региони во Македонија, како и на етнипките заедници кои живеат во неа. На фестивалот ќе бидат промовирани дел од обредните лебови и лебови кои домаќинките ги подготвуваат за семејните слави.
Сите презентирани лебови на крајот ќе бидат понудени на аукција на учесниците, а собраните средства ќе бидат донирани во Детската болница во Демир Капија.
