Фудбалерите на Македонија Ѓорче Петров и го нанесоа првиот пораз на Струга на домашен терен сезонава совладувајќи ја со 2-0 (1-0) во осмата рунда од Првата македонска фудбалска лига.

„Лавовите“, триумфот на Градскиот стадион во Струга го обезбедија со по еден постигнат погодок во двете полувремиња. Стрелец на двата голови беше капитенот Бобан Божиновски, кој стрелаше во 21-та и 63-та минута од натпреварот.

Натпреварот почна со тактичко надмудрување на средината од теренот. Домашните ја имаа иницијативата на теренот, но не успеаја да креираат посериозна прилика.

Гостинските фудбалери прв пат се заканаа во 21-та минута и постигнаа погодок. Од корнер гостите проиграа со Робсон да Силва кој од далечина биеше и ја погоди гредата, одбиената топка стигна до Божиновски кој на празен гол ја смести топката во мрежата.

На стружани им требаа само пет минути да се соземат и да се заканат кон противничкиот погодок. Ударот на Нијас Лена во 26-та минута заврши за малку покрај голот и наговести тотална иницијатива на домаќините. Нападите се зголемуваа. Најблиску до изедначувачки погодок беше Христијан Кировски кој ја погоди стативата после проигрувањето од Бурхан Мустафов.

Во второто полувреме, домаќините продолжија со нападите, но Македонија ЃП не дозволи да биде потисната на сопствената половина. Стружани не ја капитализираа надмоќноста на теренот а „лавовите“ комплетно се ослободија од притисокот.

Во 63-та минута гостите поведија со 2-0. Офанзивецот Дејан Блажески прими една топка по десната страна и со центаршут со надворешниот дел од копачката го проигра Божиновски, кој во пад и го смени правецот на топката и по втор пат го матираше домашниот голман Ѓуриќ.

После вториот погодок, домашниот стратег ги урфли во игра офанзивците од клупата. Измените внесоа свежина и креираа неколку полу шанси за погодок, но гостинската одбрана не потклекна и го задржа водството за конечна победа.

Со триумфот во Струга, Македонија ЃП стави точка на серијата од два порази додека „црвено белите“ остануваат со осум бодови, сите освоени на домашен терен.

Резултати: Струга ТЛ – Македонија ЃП 0-2, Ренова – Борец 2-1, Силекс – Работнички 1-1, Вардар – Академија Пандев 1-0, Шкупи – Шкендија 2-0.

Табела: Вардар 19, Академија Пандев 15, Македонија ЃП 14, Ренова 13, Шкупи 12, Шкендија 10, Силекс 9, Струга ТЛ 8, Работнички 7, Борец 5.

OhridNews