Просечната цена на електричната енергија за домаќинствата од 1 јануари ќе се зголеми за 0,92 проценти согласно денешната одлука на Регулаторната комисија за енергетика (РКЕ), информираше претседателот на РКЕ Марко Бислимоски.

Во првиот блок зголемувањето е 0,68 проценти, во вториот за 0,9 проценти, во третиот за 1,93 проценти, во четвртиот за 2,24 проценти, a евтината тарифа поскапува за 0,9 проценти. Тоа значи дека кај едно просечно домаќинство во државата кое има сметка од 2.300 денари ќе има зголемен трошок од 21 денар, рече Бислимоски.

Додаде дека ова е прва одлука во која што го искористиле контролниот механизам во однос на определувањето на цената на електрична енергија за домаќинствата и малите потрошувачи.

ЕВН Хоум како универзален снабдувач до РКЕ достави на контрола и разгледување одлука на 5 декември оваа година. Согласно нивното барање цената за домаќинствата требаше да се зголеми за 4,4 проценти. Во најголем дел немавме разлики, а единствената разлика која постои меѓу тоа што ние сега го одобривме и тоа што го достави ЕВН е во однос на факторот на корекција кој што за да обезбедуваме ценовна стабилност и цени кои ќе имаат минимално влијание врз вкупните трошоци за електрична енергија на граѓаните постапивме на овој начин. Како што ветивме, просечната цена на електричната енергија за домаќинствата се зголемува за 0,92 проценти, рече Бислимоски.

Новата одлука се однесува на универзалниот снабдувач кон кого долгот изнесува околу 870 милиони денари, истакна Бислимоски, посочувајќи дека му се враќаат 65 милиони денари од долгот и дополнително му се враќаат уште 132 милиони денари од повеќе остварен приход.

Долгот ќе се врати како што е предвидено со факторот на корекција и со нашиот тарифен систем, но тоа ќе го правиме чекор по чекор за да нема никакво влијание врз крајните потрошувачи, односно пред се кај домаќинствата. Секоја година ќе анализираме кога ќе доставуваат барање за цена и во зависност од приходите колку ќе ги остваруваат ќе враќаме дел од долгот. Очекувам дека за максимум 6-7 години ќе го порамниме долгот кај универзалниот снабдувач, рече Бислимоски.

Цената за електричната енергија кај домаќинствата потсети дека се состои од два дела, едниот дел е енергија, другиот дел е мрежарина.

Мрежарината за сите блокови е иста и сега изнесува 2,14 денари. За првиот блок цената на енергијата е 4,44 денари, а заедно со мрежарината е 6,58 денари за киловат час, а претходно изнесувала 6,53. Збирната цена за вториот блок, енергија и мрежарина, е 7,71 денар, а претходно изнесувала 7,64 денари. Цената во третиот блок е 9,57, а претходно изнесувала 9,39 денари. Во четвртиот блок е 20,4 денари, а претходно изнесувала 20 денари. Цената на евтината тарифа изнесува 4,12 денари, а претходно изнесувала 4,08 денари, појасни Бислимоски.

Со претходната одлука, потсети, РКЕ ја намали цената на мрежарината пред се во делот на дистрибуција.

OhridNews