Пронајдени и извадени околу 100 парчиња оружје од „турско“

Деновиве заврши проектот од Министерството за култура за наоѓање и вадење на старо турско оружје кое лежи на дното од Охридското езеро. Главно „актери“ во целата работа беа нуркачите од Клубот за подводни активности. Оружјето (кое при рутинско нуркање го пронајде Боби Горичан) во повеќе наврати беше собирано и вадено на суво, односно носено на реставрација во Завод и музеј. Водачот на нуркачката група, инструкторот по нуркање Милутин Секулоски вели дека се извадени околу стотина парчиња старо оружје, и тоа на потег од 300 метри од брегот, кај Сараиште. Длабочината на која „лежело“ е околу 5-6 метри.

„Штета што не располагавме со повеќе финансии“ вели Секулоски. „Ќе извадевме многу повеќе. На дното има многу предмети (оружје), кубури, пушки танчици (веројатно така ги викаат заради тенката цевка) и др. Интересно е што сите се пронајдени на мало растојание. Дали некој сакал набрзина да се ослободи од нив па наеднаш ги исфрлил, не ни е познато“ додава Секулоски. Местата на кои е пронајдено оружје се фотографирани и обележани.

Историчарот од Завод и музеј Никола Целакоски вели дека можно е во иднина да има некоја поставка каде ќе бидат изложени овие интерени историски експонати, но најпрвин треба да поминат низ долготраен и скап процес на реставрација.