Промоција на собраното творештво на Димитрие Дурацоски

Во петок, 27 јули, со почеток од 20,30 часот, на Летната сцена од НУ Центар за култура „Браќа Миладиновци“ во Струга, издавачката куќа Темплум, ќе го промовира Собраното творештво на Димитрие Дурацоски, познат писател и сликар кој живее и создава, на двете води, во Струга.

-Значи ве канам сите љубопитни и пријатели кој ќе бидете во Струга да дојдете да се видиме. Убаво би било да не врни, да гледаме ѕвезди на небото над Струга. Треба нешто да кажат за книгите: Живко Гроздановски, Никола Гелевски, Оливера Ќорвезироска, Елизабета Шелева и Тихомир Јанчовски. – порачува Дурацоски.

Димитрие Дурацоски (1952, Струга), дипломирал на Школата за применети уметности, сликарски отсек, во класата на проф. Родољуб Анастасов. Објавува раскази, куси прози и есеистички текстови во списанијата: Разгледи, Современост, Стремеж, Тренд, Летопис Матице Српске, Поља, Шветлосц, Нови живот (Нови Сад), Живот, Израз, Даље, Сарајевске свеске (Сараево), Лаус (Риека), Књижевна Реч, Књижевне новине, Књижевни магазин (Белград), Наше писмо, Блесок, Стожер, Окно и во повеќе дневни весници и списанија. Бил припадник на литературната група Петти круг. Членувал во редакциите на списанијата Даље, Форма, Далги и Стожер (гласило на Друштвото на писателите на Македонија).

Застапуван е во повеќе домашни и меѓународни збирки и антологии, а неговите литературни и ликовни дела се застапени и се предмет на анализа во повеќе студии и книги за теорија на ликовната уметност и литературата.

Ги објавил монографиите Струга, град, вода, луѓе (1995), Струга вчера и денес (2003), Откривање на другиот (2004) и мапата Икони од Струга (2006), Ги објавил книгите раскази: Тајна историја, 1986 година; Црни пророци, 1996 година; романот Инсомниа, 2001 година за која истата година ја добил наградата за најдобра книга во Македонија – Рациновото признание. 2014 година ја објави книгата Бледи сенки далечни гласови за која 2015 година повторно го добил Рациновото признание. Добитник е на 8-ноемвриската награда на град Струга во 1986 година од областа на културата и уметноста.

Член е на Друштвото на писателите на Македонија од 1989 година.

Во текот на изминатите години реализирал повеќе самостојни изложби и соработувал со многу автори од областа на ликовните уметности и од литературата во земјава и надвор од неа.