„Истрага на местото на кодирањето“ е мотото на програмерскиот маратон Codefest кој на 18-ти и 19-ти април 2015 година ќе се одржува на Универзитетот за информатички науки и технологии „Св. Апостол Павле“ во Охрид.

Во текот на 32 непрекинати маратонски часови, студентите ќе работат во тимови на развивање на креативни и иновативни идеи до демо верзија на продукт, а сето тоа ќе биде поддржано од страна на бројни ментори, експерти од неколку области од нашата држава.

-Сведоци сме на овој настан уште од неговите почетоци пред 3 години, кога почна како помала организација со 70 учесници. Денеска, Codefest е етаблиран настан кој претставува бренд самиот за себе во Македонија и успева да донесе на едно место студенти од целата држава, не само од ИТ областа туку и од сродни области. Целта на Codefest е да ги приближи студентите до компаниите во кои тие набрзо би биле потенцијални вработени, како исклучителен талент од Македонија, велат организаторите.

Тие информираат дека покрај поддршката од менторите и националните компании, Codefest добива и значителна поддршка од интернационални компании и организации.

-Видливоста на настанот на интернационално ниво секојдневно се зголемува. Во таа насока оди и ексклузивната најава за гостување на почесниот гостин-говорник, г-дин Ербил Караман, продукт менаџер во Facebook Лондон, што претставува доста атрактивен аспект на настанот, најавуваат организаторите.

Дел од студентите кои веќе биле дел од овој Codefest велат дека се многу задоволни што имале можност да бидат дел од ваков атрактивен настан.

-Моето искуство со Codefest е незаборавно. Енергијата, луѓето со отворен ум, идеите и организацијата се споија како делчиња од сложувалка во совршена хармонија која продуцираше голем број на пријателства и прекрасни моменти. Најдобар настан што постои, изјави Марко Толевски, учесник на Codefest 2014 и член на победничкиот тим Equate од Битола.

Апликациите за Codefest 2015 се во тек и траат до 7-ми април. Повеќе информации може да се најдат на веб сајтот на настанот www.codefest.ninja или на Facebook страницата: https://www.facebook.com/pages/Codefest/926573710705257.

OhridNews