Проаква доби струја, стружани вода. До кога?!

Близу 100.000 граѓани на Струга и туристи еден ден беа оставени без вода за пиење откако ЕВН поради неплатени долгови вчера ја исклучи струјата на МЈП Проаква. Поради исклучувањето на пумпните станици во ШУМ без вода останаа и јавни установи, болницата, хотелите и рестораните. Според одговорните во Проаква и градските власти,  ЕВН се однесува крајно непрофесионално и ја злоупотребува монополската позиција. Пред само две недели во Струга на средба со раководните лица на ЕВН  постигнавме договор за начинот  на сервисирање на долговите и сега излегува дека тоа за ЕВН не важи, изјави на прес конференција, Бранислав Трпчески, директор на „Проаква“

Заостанатиот долг на општина Струга кон ЕВН изнесуваат 500.000 евра, кој спорд договорот треба да  биде подмирен со отстапување на ЕВН на трафостаници и друга синфраструктура во сопственост на општините Охрид и Струга, додека дел од долговите за колекторот согласно донесената  одлука на владата треба да ги преземат хидроцентралите Глобочица и Шпилје, објаснува Трпчески.

По предупредувачкото исклучување денеска на пладне водоснабдителната станица во Шум повторно беше вклучена во електросистемот, а на барање на локалната самоуправа  основниот во Струга донесе времена мерка со која и се наложува на ЕВН да обезбеди непрекинато снабдување со струја на пумпите кои ја снабдуваат Струга со вода како и да се воздржи од натамошно исклучување. Градоначалникот Рамиз Мерко вели дека општината нема да застане тука и ќе бараа отштета и одговорност за настанатата ситуација. „Ќе поднесеме кривични пријави против одговорните во ЕВН и Електро Струга“, рече Мерко.

Портпаролот на ЕВН, Златко Попоски, во изјава за Ohridnews рече дека  Проаква била исклучена од електросистемот во знак на предупредување поради тоа што не бил испочитуван двонеделниот рок за подмирување на заостанатуите долгови кој го побарало самото јавно претпријатие. Оттаму информираат дека доколку до крајот на месецот Проаква не го подмири долгот, јавното претпријатие повторно  ќе биде исклучено од електросистемот.