Секторот за внатрешни работи- Охрид и Оделението за превенција, на 1-ви Декември, во 12 часот, во Средното угостителско училиште „Ванчо Питошески„ ќе го одржат 17-от состанок со советодавната група на граѓани од Охрид.
На состанокот, пред присутните, ќе бидат презентирани предвидените активности од проектите „Доброволно предавање на нелегално оружје„ и „Превенција од злоупотреба на оружје„. кои се одвиваат под мотото „Да прославиме без оружје„.
Целта на овие проектни активности е едукација на населението за законската легислатива од Законот за оружје, укажување на потребата од избегнување на неовластена употреба, а особено користење на оружје при разни свечености и можните ризици и опасности од неговата злоупотреба.
Средбата со советодавната група граѓани ќе биде искористена и за конкретизирање на мерките за едукација на учениците за опасностите при употреба на пиротехнички средства.
На состанокот, на кој ќе биде презентиран видео и пропаганден материјал, свои излагања ќе имаат претставници на Советот на родители, Секторот за внатрешни работи Охрид, Секторот за Образование во Општините Охрид и Дебрца, од Локалниот совет за превенција,Општата болница Охрид, Невладините организации, Црвениот крст, ОБСЕ.
