Преку демонстрации на подготовка на македонски јадења, на специјалитети со користење на локални производи на француски и на ирски начин, студентите од Факултетот за туризам и угостителство во Охрид од прва, втора и трета година запишани на гастрономија и хотелско-ресторански менаџмент имаа можност да стекнат нови вештини во однос на подготовката на храната. Нашите студенти треба да бидат оспособени за создавање на квалитетен производ, вели доц. д-р Климент Наумов од ФТУ.
Ова е веќе четврта година како соработуваме со колеџот Жесе де Форе од Авен сур Елп Република Франција и Tехнолошкиот институт Голвеј-Мајо од Република Ирска. Прекрасна е можност за студентите да ја апсолвираат теоријата и да ја преточат во пракса, да видат како навистина се прават врвни специјалитети. Станува збор за висока гастрономија, а не за некој просечен угостителско ресторански производ или брза храна. – рече Наумов.
Студентите имаа презентација на подготовка на патка на начин специфичен за западниот дел од Ирска, преку конференциска врска со институтот од Ирска. Беше презентирано и како се чади лосос. Истите состојќи ги имавме во кујната и ги повторивме со студентите. Во продолжение следеше и демонстрација на професорката Мери Рид, една од најпознатите слаткарки, која подготви ганаш и презентираше работа со чоколадо, правење пралини. Сето тоа студентите го подготвија и направија чоколадни бомбони, вели Наумов.
Додава дека денес имале француски ден каде шеф Кристоф Доверн од францускиот колеџ, имал презентација на неколку рецепти, две тартови традиционални слатки јадења од Нормандија и Алзас, сосема источно и западно од Франција, дел од нивното кулинарско наследство. Подготвени биле и пилешки гради со користење на карамелизиран путер и моркови на турне начин, нешто што е навистина дел од високата гастрономија на Франција.
Во наредните три години е планиран проект во кој ќе биде вклучен нашиот факултет, Институт од Валенсија, Шпанија, колеџот Жесе де Форе од Франција и Tехнолошки институт од Република Ирска Голвеј-Мајо. Проект се однесува на намалувањето на отпад во кујната и во рестораните, промоција на рециклирање, користење на остатоци од храна, дали за нутритивни цели или како ѓубриво односно компостирање, како и користење на некои алтернативни материјали за амбалажа. Да избегнуваме да користиме пластика, најлон, се тоа што може да ја загади околината, додава Наумов.
Вели дека ФТУ има многу добра соработка со врвни готвачи од Балканот и најави дека во сабота еден од најдобрите готвачи на Балканот, Стево Карапанџа, ќе одржи мотивационен говор пред студентите, а неговите колеги ќе направат демо презентација на подготовка на некои типчни јадења за овие простори.
Што се однесува до промоција на гастромијата правиме крајни напори да им покажеме на студентите дека тие кога ќе завршат стануваат промотори на гастрономијата, туризмот, хотелиерството и нема подобра промоција од пренесување на добро искуство, истакнува Наумов.
Н.С.Ј.
