Правила за известување од претстојната изборната кампања на Ohridnews

Согласно законските одредби, Ohridnews, во пресрет на изборната кампања јавно го објавува Правилникот за покривање на локалните и претседателски избори 2009 година:

Електронскиот весник Ohridnews ќе известува од претстојните локални и претседателски избори, согласно професионалните стандарди и  постоечките изборни правила и закони. За време на изборната кампања весникот во презентацијата на информациите и другите содржини на веб порталот исклучиво ќе се води од сопствената уредувачка политика која се потпира на принципите на непристрасност избалансираност, објективност и точност, благодарение на што, www.ohridnews.com, денеска е најчитаниот интернет портал во регионот, со високо реноме и углед.

Ohridnews неодамна ја објави 10.000-та  вест. Просечно дневно нашиот интернет портал има 4.300 уникатни посети, односно над 20.000 видувања (извор Google stat.). Месечно Ohridnews остварува 120.000 уникатни посети, а вкупниот број на посетители од отворањето на весникот ја надмина бројката од 1,5 милиони. Ваквата силна доверба на читателите дополнително не обврзува на запазување на востановените високи стандари и принципи на информирање на јавноста и во периодот на избори, кога по обичај засилено е влијанието на политичките структури врз медиумите.

За таа цел редакцијата на Ohridnews изготви Правилник за медиумско покривање на претседателските и локалните избори, што ќе се одржат на 22 март 2009 година, кој јавно го презентираме со цел читателите и пред се политичките субјекти да се запознаат со правилата на известување за време на изборната кампања што ќе важат на Ohridnews:

1. Ohridnews за време на изборната кампања (02-22 март 2009г.) ќе ја задржи препознатливата објективност и ќе остане политички неутрален. При известувањето од изборите во информативниот блок, редакцијата на Ohridnews ќе обезбеди рамноправен третман на сите учесници во кампањата за локалните и претседателски избори што ќе се одржат на 22 март.

2. За време на изборната кампања Ohridnews  бесплатно, ќе информира за изборната постапка и ќе  презентира информации од јавен карактер поврзани со изборите. Информациите од Министерството за правда, МВР, ДИК и другите надлежни институции задолжени за спроведување на изборите ќе бидат објавувани во рубриката соопштенија или преку новинарски извештаи во блокот вести. Ohridnews избалансирано ќе информира од митинзите на политичките партии, како и од прес конференциите, кои ќе бидат пренесувани во куса форма. Сите останати форми на медиумско претставување, вклучително и сервисот соопштенија, политичките субјекти вклучени во кампањата ќе можат да ги користат за сопствена промоција во делот на платеното политичко рекламирање
 
3. На сите учесници во изборната кампања Ohridnews ќе им овозожи платено политичко рекламирање под еднакви услови, согласно официјалниот ценовник за платено политичко рекламирање на претстојните локални и претседателски избори, кој ќе им биде доставен на политичките субјекти. Платеното политичко рекламирање ќе се емитува во посебен простор предвиден за таа намена, јасно обележан и одвоен од останатите содржини, согласно законските прописи.

4. Предност во избирање на простор за рекламирање и поставување на банери и други рекламни содржини во делот за платено политичко презентирање, ќе имаат субјектите кои први ќе склучат договор со Ohridnews.

5. За време на изборната кампања (02-22 март 2009г.) редакцијата ќе се труди дневните информации, вестите и извештаите за изборните случувања да ги објавува навремено и непристрасно. Учесниците во кампањата ќе имаат право на демант, бесплатно и во најкус рок, само на објавените информации од и на електронскиот весник www.ohridnews.com.

6. Согласно законите и пропишаните правила, за време на изборната кампања нема да се објавуваат информации за активностите на претставниците на државните органи и институции, на органите на локалната самоуправа  и на други јавни личности, што се во функција на изборната кампања, а не се најавени како такви.

7. Ohridnews нема да објавува вести, информации, соопштенија и реклами кои поттикнуват било каква верска, национална или друга нетрпеливост и повикуваат на насилно уривање на системот и бојкот на изборите. Исто така нема да се објавуваат информации, фотографии, видео и аудио записи кои се однесуваат на деца помлади од 14 години.

8. Во периодот на избори редакцијата на Ohridnews ќе се воздржи од коментари, освен во случај на флагрантно кршење на изборните правила. Во тој период нема да се објавуваат колумни и писма на читатели кои се однесуваат на изборната кампања и учесниците во неа.

9. Согласно начелата за професионално и непристрасно известување, Ohridnews им забранува на своите вработени и на лицата ангажирани хонорарно било каков ангажман во изборната кампања.