За десетина дена во Охрид се случија пет несереќи на параглајдеристи, од која една со трагичен епилог. Педесет и пет годишен параглајдерист од Србија вчера го загуби животот при изведување на опасен маневар во месноста викана „Зли дол“ на планината Галичица. На трагедијата и претходеа уште два одделни инциденти во кои двајца натпреварувачи на Светскиот куп во прецизно слетување што се одржува во Охрид, доживеаја несреќи. Двајцата се здобија со скршеници на екстремитетите и по укажаната помош во Коснозглобната болница се пуштени на домашно лекување.


Неодамна руски параглајдерист при слетување во близина на авто кампот Љубаништа повреди дете, а негов сонародник се здоби со скршеници и беше хоспитализиран.

Серијата несреќи во кус временски период го отвори прашањето за безбедноста на трагачите по адреналински авантури, како што често се нарекуваат параглајдеристите. Галичица и живописниот охридски крај се атрактивни дестинации за параглајдеристите, кои не ја кријат својата воодушевеност од Охрид.

–Галичица е многу погодна за параглајдинг и одлична е за летање. Условите се прекрасни, а глетката преубава, вели словенецот Јака Горинц, неколкукратен светски првак во параглајдинг и учесник на Светскиот куп во Охрид.


Полна со импресии е и бугарската параглајдеристка Николина Илева.

– Прв пат летам тука и просто неверојатно е колку е убаво. Може да се лета долго и тоа е навистина прекрасно чувство, вели Илева.


Очигледно е дека ловците по авантури се водат од своите чувства во потрагата по адреналинска возбуда која овој  екстремен спорт ја нуди во неограничени количини. Но токму контролата на чувствата и присебноста е пресудна за безбедноста на параглајдеристот, вели Киро Гиноски од „Делта“ клубот.

-Параглајдингот е безбеден онолку колку што сака пилотот. Ако пилотот рескира и слетува од Галичица со 200 ќе направи несреќа. Параглајдингот е безбеден онолку колку што сака пилотот, вели Гиноски.


Дали несреќниот Ранџеловиќ бил невнимателен и ја предизвикал судбината, или сплет на околности и ветер придонеле тој да загуби контрола врз леталото, се прашања на кои одговор треба да даде истрагата за несреќата која ја вознемири пошироката јавност.

Ohridnews