Одделот за внатрешна контрола, криминалистички истраги и професионални стандарди при МВР до надлежното Основно јавно обвинителство Охрид поднесе кривична пријава против полициски службеник во ПСОН Охрид при СВР Охрид, поради постоење основи на сомнение дека сторил кривично дело „неовластено производство и пуштање во промет на наркотични дроги, психотропни супстанции и прекурсори “ по член 215 став 1 од КЗ.
При извршување работни задачи на обезбедување на вила Бела (поранешна вила Македонија), сопственост на Министерството за внатрешни работи, од страна на вработени во Одделот за внатрешна контрола, криминалистички истраги и професионални стандарди бил извршен преглед кај полицаецот и работната просторија- стражарската куќарка, при што на работната маса била затекната метална лажица во која имало бела прашкаста материја, хартиена салфетка во која имало бела прашкаста материја и мало пластично шише со непозната течност, со импровизирана цевка од банкнота од 10 денари, затворено со алуминиумска фолија на отворот на шишето, на која имало остатоци од непозната материја, соопшти МВР.
Полицаецот одбил да се подложи на испитување за користење на дрога. Против него од страна на Одделот за внатрешна контрола, криминалистички истраги и професионални стандарди покрената е дисциплинска постапка и тој е суспендиран од работа, информира МВР.
OhridNews
