Подобувањето на патната инфраструктурата од Кичево кон  Охрид и од Охрид до Битола, е од големо значење за  максималното искористување на капацитетите на Охридскиот аеродром. Ова беше потенцирано на средбата што градоначалникот Александар Петрески ја оствари со Неџат Курт, одговорен во менаџерскиот тим на ТАВ-Македонија,  кој е новиот сопственик на македонските аеродроми.


На неформалниот прием кој во Општина Охрид, се одржа вчера, се  разменија голем број мислења и очекувања за влегувањето на ТАВ-Македонија, во македонското авио-сообраќај. Исто така беше зборувано и за Развојните планови кој  Општина Охрид, ги има изготвено, за инфраструктурно уредување на  просторот, кој гравитира кон Аеродромот Св.Апостол Павле.

– Ќе соработуваме со  менаџментот на вашата компанија и ќе ја имате целокупната наша поддршка. Се’ што е во наш домен, со максимални сили и според објективните можности ќе се потрудиме да помогнеме.– му вети  Петрески, на менаџерот Курт.

Тој изрази и надеж дека наскоро ќе се реализираат  и ветувањата на Владата за автопатно поврзување на Охрид преку Гостивар со Скопје, како и кон македонско-албанската граница, бидејки добрата сообраќајна поврзаност на Охрид со светот, еден од  најважните  услови за развојот на туризмот и стопанството воопшто.

Ohridnews