Во Брисел денеска започнува самитот на Европската унија на кој земјите членки на Еврозоната ќе се обидат да изнајдат решение за должничката криза, која го загрозува нејзиниот опстанок.
Во пресрет на самитот, подеднакво е присутен оптимимазам колку и песимизам дека мерките кои ќе бидат предложени за разрешување на должничката криза ќе ја спасат Еврозоната. Францускиот претседател Николас Саркози беше најдиректен изразувајќи отворено стравување за иднината на еврото и Еврозоната доколку не се изнајде решение за кризата. Тој се надева дека на претстојниот самит ќе биде постигнат компромис за понудените решенија, затоа што според него Европа нема втора шанса.
– Треба веднаш да се донесе одлука. Што подолго чекаме, одлуката ќе биде поскапа и помалку ефикасна, ако во петок не постигнеме договор, нема да имаме втора шанса, изјави Саркози по средбата со германската канцеларка Меркел и европските лидери на десниот центар што се одржа во Марсеј во предвечерјето на Самитот во Брисел.
Канцеларката Меркел изрази уверување дека ќе бидат изнајдени добри решенија на самитот.
-Уверена сум дека ќе најдеме решенија за сите отворени прашања, истакна Меркел, притоа признавајќи дека тоа ќе биде исклучително тешка задача.
Во решение на кризата верува и претседателот на Европската комисија Жозе Мануел Баросо.
-Ги повикувам сите шефови на држави да покажат посветеност кон нашата заедничка валута, додаде Баросо.
Нацрт документот кој ќе се разгледува на Самитот во Брисел содржи краткорочни и долгорочни мерки, но малкумина веруваат дека тие ќе бидат прифатени од сите 27 земји членки на ЕУ.
