Почина еден од најголемите светски поети и писатели, добитник на „Златен венец“ на Струшките вечери на поезијата за 2013 година, Хосе Емилио Пачеко.
„Горди сме на тоа што имавме една таква прекрасна личност и творец за лауреат на најпрестижната светска награда за поезија. Неговото поетско дело ќе продолжи да живее и низ препевот на македонски јазик. Сочувствуваме со огромната болка на семејството заради ненадоместливата загуба. на бардот кој на светската литература ѝ подари дело неодминливо по уметничките и естетски вредности. Во миговите на тага се потсетуваме на прекрасните мигови од неговиот престој во Република Македонија во 2013 година, кога му беше врачен „Златниот венец“ за особените остварувања на неговото поетско творештво.“ – велат од НУМ Струшки вечери на поезијата.
Инаку, Хосе Емилио Пачеко е роден во Мексико Сити во 1939 година. Предавал книжевност на многу универзитети во Јужна Америка, САД и Канада. Бил член на Мексиканската академија на јазиците. За своето исклучително поетско творештво многукратно е наградуван, а лауреат е и на големата награда „Сервантес“.
OhridNews
