Шифрирано писмо кое Наполеон Бонапарта го испратил во 1812 година во кое се пофалил дека француската војска ќе го крене во воздух московскиот Кремљ било продадено на аукција за 243 илјади и 500 долари, по цена десет пати повисока од проценетата. Парискиот музеј за писма и ракописи го купил овој документ датиран на 20 октомври 1812 година.
Почетната цена на писмото изнесувала нешто помалку од 20 илјади долари. Аукционерите од аукциската куќа Фонтенбло во Париз изјавиле дека писмото е уникатно. Напишано било со нумерички код кој го користеле француските владетели. Една од речениците во писмото гласела „Во три часот наутро, на 22, јас ќе го разнесам Кремљ“.
