Писма: Агенцијата за туризам за едни мајка, за други маштеа

Сигурно кога сте оделе на училиште, една од најомразените работи Ви била учењето песни на памет. Ама изгледа челните луѓе на Агенцијата за поддршка и развој на нашиов отепан туризам, не биле едни од тие ученици. Тие добро си ја научиле на памет домашната работа, па така ако некој само ги потпраша што сработивте, веднаш ќе Ви изрецитираат дека оваа година биле на овој саем, на оној семинар, во онаа држава, направиле незнам каква презентација, донесле туроператори од јабана итн,итн. Ако ги прашате колку посетители имале на овогодинешниот саем во Охрид, не ќе знаат да Ви кажат, ама на колку саеми биле ќе ви одговорат како од пушка.

 Е добро де сега. Луѓево навистина работат нешто. Па не е лесно да шеташ по државине на саеми секоја недела и да носиш во Охрид кинески новинари и руски туроператори и да ги шеташ по ручеци и излети. И на крај сето тоа ќе го исфилуваш со по една, да се изразам културно “бе 2” средба, колку од далеку хотелиериве да ги видиме искосените очи на Кинезите и Јапонците, за да не ни остани мерак.  

А голем број од хотелите повеќе не ни пуштаат свој претставник на ваквите седенки, за да не си го губат времето кога јавна тајна е дека соработката е веќе однапред договорена со крупните играчи кои добро ја подмачкале работата, а на останатите им ги мачкаат само
очите.

Мачкано, немачкано, сепак ич немаше да ми биде мака ако видевме досега барем малку повратен резултат и во било кој хотел ( па дури и на комшијана) да престојуваше една група од земјите на досега донесените туроператори. А тие кутрите зашеметени од убајните што ги видоа низ Охрид заборавија да прашаат и кои се цените на хотелските објекти што им беа презентирани. И пак како за унер, барем некој да одговореше на испратените пријателски е-мејлови, барем дека стигнале здрави и живи, не мора да пуштат туристи ако не сакаат.

 И пак имало-немало резултат од ваквите средби со странски туроператори, туристичкиов еснаф пак ќе си оди на нив, па барем ќе си полафиме со кафенце. Е сега тука е најголемата смешка, што челните луѓе на Агенцијата, селективно одлучуваат кого ќе го известат да присуствува на тие состаноци. Значи ако на некој од главните не му си симпатичен и не му се допаѓа твојот сместувачки објект, заборави дека ќе добиеш известување, па ти ако сакаш на глава застани. Нормално со сила не бива убавина, а уште помалку во ова капиталистичко време. Но, бидејќи колку што знам Агенцијата за туризам е државна и нејзините вработени земаат плата од нас, не ми е јасно од каде некои ситни, исфрустрирани души имаат право со нашите народни пари да прават приватен есап. А,можеби во меѓувреме Агенцијата си ја купија нејзиниот директор и вработените и стана приватна фирма, не знам, можеби треба да се јавам и прашам во Министерство за економија.