– Не можеме да ја откриеме цената по која ќе бидат набавени екраните, затоа што тендерот е во фаза на разгледување, но одговорно тврдиме дека ќе се избере операторот со најповолна понуда и за многу помала вредност од онаа со која се шпекулира деновиве во јавноста, рече Симоноски. Како што тој потенцира, тендерот е распишан согласно Програмата за поттикнување на развојот на туризмот на општина Охрид за 2010 година и е дел од стратегијата за одржлив развој на туризмот.
Шпекулациите кои се пласираат од страна на ВМРО- ДПМНЕ околу цената по која ќе се набават екраните на допир, е обид на актуелната власт да се прикријат условите под кои тие распишуваат тендери, како што е оној за поставување интернет- киосци до подрачните училишта во руралните средини кои чинат многу повеќе од информативните екрани, а се поставуваат и без потребните одобренија од училиштата, рече градоначалникот Петрески.
– За својата работа градоначалникот и локалната самоуправа одговараат пред граѓаните и соодветните органи кои треба да ја контролираат нивната работа, а не политичките партии, рече Петрески и додаде: – За жал ВМРО- ДПМНЕ продолжува да се занимава со нас, затоа што е очигледно дека нема попаметна работа.
Овие екрани му се потребни на Охрид и туристите кои доаѓаат и ќе го надополнат недостатокот од информации кој досега постоеше. За почеток ќе се набават само неколку, зависно од условите и средствата со кои располагаме. Екраните ќе се постават на неколку- најфреквентни локации со туристи. За нивна заштита ќе бидат поставени и безбедносни камери, велат од Локалната самоуправа.
