По повод денешното свечено отворање на 50-то, јубилејно, издание на сценско-музичкиот фестивал „Охридско Лето“, градоначалникот Александар Петрески упати честитка до Управата, Дирекцијата и учесниците на оваа реномирана културна манифестација која веќе половина век го афирмира Охрид ширум светот преку уметноста и културата не познавајки и не признавајки никакви граници. Во честитката на Градоначалникот меѓу другото се вели:
„Охридско Лето“ како светски позната манифестација на која настапувале врвни имиња на своето време од областа на репродуктивната музичка уметност, диригенти, современи композитори, драмски уметници,театарски, оперски и балетски куќи, и Охрид како град на културното и духовно живеење – станаа синоним еден за друг.Започната кон средината на минатиот век, оваа манифестација се потврдува како најдобар презентент на нашиот град и нашата земја ширум светот и во првата декада на новиот милениум.
Генерации наши сограѓани културно се воздигнувале благодарение на концертите, рециталите, оперите, балетите и театарските претстави на уметниците кои давале белег на своето. Една цела генерација наши сограѓани израсна заедно со Фестивалот, а илјадници гости и туристи, уметнички дејци и поклоници на културата и уметноста за навек понесоа незаборавни впечатоци за Фестивалот или градот-домаќин посакувајки барем уште еднаш во животот или кариерата да бидат гости на Охрид и „Охридско Лето“.
Посакувам, во името на градот-домаќин и своите сограѓани, ова јубилејно, 50-то издание на „Охридско Лето“ да го потврди уште еднаш своето високо светско реноме, а на учесниците, посетителите и гостите – да бидат исполнети со незаборавни впечатоци кои можат да ги понесат само од Охрид и неговата најстара и најафирмирана културна манифестација.
Среќни сме што сме современици на овој „златен јубилеј“ на Фестивалот и посакуваме уште многу успешни години и јубилеи на задоволство на сите нас и идните генерации учесници и посетители на „Охридско Лето“
Ohridnews
