Вербалната војна помеѓу централната и локалната власт во Охрид околу набавката на ново патничко возило за потребите на општината не стивнува. Откако портпаролите на ВМРО ДПМНЕ и на општина Охрид, Александар Бичиклиски и Никола Манески си разменија остри зборови, на темата се огласи и градоначалникот на Охррид. Во изјава за локалните медиуми на свеченоста по повод пуштањето во употреба на пешачката патека кај Кошишта, Петрески истакна дека набавката на новото службено возило на општината чини колку еден лет со хеликоптер на владините министри од Скопје до Охрид.
Општина Охрид нема купено ново возило 7 години, а градоначалникот оди на пат со старо возило со што се загрозува неговата безбедност, истакна Петрески.
Тој зајадливо му реплицираше на портпаролот Бичиклиски за прозивките дека градоначалникот на општина Охрид во време на економска криза троши пари за луксузно возило. „Можам да му кажам на Бичиклиски дека имам нов телефон и нови кондури број 42,5“, иронично изјави Петрески.
– Господинот Бичиклиски да си ги погледне пратениците од ВМРО ДПМНЕ и министрите кои за роденден на своите синови или сопруги им купуваат вакво возило, додаде Петрески.
