Претседателот на држават Стево Пендаровски, на 7 и 8 октомври 2020 година, во Братислава, Словачката Република, ќе учествува на Глобалниот безбедносен форум „ГЛОБСЕК 2020“ каде ќе има свое обраќање на тема „Западен Балкан по Ковид-19“.
За време на работната посета на Братислава предвидено е претседателот Пендаровски да оствари билатерална средба со Сузана Чапутова, претседателка на Словачката Република, Мирослав Лајчак специјален претставник на ЕУ за дијалогот Белград-Приштина и за други прашања за Западен Балкан и Олга Стефанишина, заменик премиерка за европска и евроатлантска интеграција на Украина.
Годинешниот форум „ГЛОБСЕК 2020“ се одржува под мото „Заеднички да го излечиме светот – опоравување по целосното затворање“, а темите на дискусија се фокусирани на влијанието на кризата од КОВИД-19 врз повеќе сфери од општествениот, економскиот, социјалниот и политичкиот живот, како и можностите за изнаоѓање одржливи решенија во периодот што следи.
На конференцијата свое учество ќе имаат шефови на држави и влади, министри за надворешни работи, парламентарни делегации, претставници од бизнис заедницата, како и бројни претставници на влијателни меѓународни невладини и тинк-тенк организации од Европа и светот.
OhridNews
