Средношколците чии семејства примаат социјална парична помош, годишно ќе добиваат паричен надоместок од 12.000 денари во текот на една училишна година. Ова се новините што се содржани во Програмата за условени парични трансфери на Министерството за труд и социјална политика. Со неа се опфатени средношколците кои се од домаќинства корисници на социјална помош, домаќинства корисници на социјална парична помош чие право на помош е во мирување поради ангажирање во јавна работа и домаќинства кои во текот на учебната година ќе остварат право на социјална парична помош, а не се корисници на детски додаток.
Еден од основните услови е редовното посетување на наставата кое треба да биде околу 85 отсто и ќе се докажува со белешки кои ќе ги издаваат средните училишта. Аплицирањето за користење на ова право започна вчера и ќе трае до 30 ноември.
По исполнувањето на условите Центрите за социјална работа ќе издаваат решенија за условен паричен надомест , а првите пари средношколците ќе ги добијат во декември.
Оваа Програма за прв пат се имплементира во Македонија и ќе трае до 2014 година, а за нејзина цел обезбедени се 25 милиони долари со кредит од Светската банка.
OhridNews
