Советникот Дејан Пановски реагира на односот на Советот кон екологијата. Тој го повика на одговорност мнозинството во градскиот совет, кое според него на последната седница неаргументирано го одбило неговиот предлог во рамките на предложениот ребаланс на буџетот на Општината да се издвојат средства за два важни еко-туристички зафати. Едниот се однесува на обележување на границите на Студенчишко блато и негова заштита и валоризација во вредност 500.000 денари и обележување и промоција на сулфетарата Дувало (вулканот Косел) како туристичка вредност во износ од 300.000 денари, посочи Пановски.
-Сумата од 800.000 денари би се префрлила од ставката копирање , печатење каде средствата на расходите и онака би се намалиле со принципот електронска општина, но предлозите без логично објаснување беа отфрлени од мнозинството. Чинам дека овие два зафати се неопходни за Охрид и не се предмет за политичка мајоризација и манипулација туку интерес за јавното добро на градот, рече Пановски.
Според него предлогот бил конструктивен и во контекст на очајната туристичка организација на Охрид, кој според Пановски е срамна.
– Охрид од свет град стана панаѓурски град без притоа никој од градските власти да мрдне со прст или да понесе одговорност. Притоа забележително беше застрашувачкотот ниво на некритичност на немање капацитет за соочување со реалноста и критиките и за лажно себепромовирање за наводна успешност.Тоа Охрид го носи во тешка криза на дигнитетот, криза на управувањето , криза на доблесните норми“, смета Пановски.
