Очигледно во некаков нервозен настап градоначалникот повторно изнесува манипулации, реплицира советникот на ВМРО ДПМНЕ, Дејан Пановски, на изјавата на првиот човек на градот кој побара Антикорупциската комисија да го провери работењето на Проектот за заштита на Охридското Езеро, со кој раководеше Пановски.
-Проектот за заштита на Охридското Езеро е завршен уште во 2003- 2004 година и никакви милионски средства не се користени во десетгодишен период. Како што знае целата јавност во периодот кога се реализираше проектот се извршени три државни ревизии, а имаше и пет до шест мисии на Светска банка која го финансираше тој проект, така што мислам дека тука се работи за обична манипулација на градоначалникот која не заслужува поширок коментар.-изјави Пановски.
Според него забелешките на надлежните институции за присуство на корупција во урбанизамот во Охрид се јасни, а тоа било потврдено и од извештајот на градежниот инспекторат кој го разгледувал Советот, во кој било наведено дека се поднесени голем број кривични пријави и забрани од областа на градежништвото и урбанизмот.
-Нека се повика градоначалникот само на тој извештај и ќе му биде јасно што се случува во урбанистичката сфера во Охрид, додаде Пановски.
