Со музичко сценски спектакл, синоќа, на Античкиот театар свечено беше отворено јубилејното, 50-то издание на фестивалот Охридско лето. Гостите меѓу кои имаше политичари, претставници на дипломатскиот кор,  јавни личности, уметници, ги поздравија министерката за култура Елизабета Канческа Милеска и Претседателот Ѓорѓе Иванов, а фестивалот за отворен- преку видео порака го прогласи славната оперска певица  Ана Липша Тофовиќ, со чиј настап на 4-ти август 1961 година во катедралната црква Св. Софија, започна фестивалската историја.

– Пресреќна сум што идејата на мојот сопруг и моја, се оствари, еден концерт да прерасне во фестивал. Да е вечно Охридско лето како што е вечна Македонија. – истакна Ана Липша Тофовиќ.


На отворањето на фестивалот публиката имаше можност да го проследи настапот на македонскиот пијанист Симон Трпчески и  Рускиот национален оркестар, под диригентска палка на светски познатиот музички уметник, Михаил Плетнев.


За изведбата врвните уметници на крајот од концертот беа поздравени со неколкуминутни овации, по што Трпчески се врати на бис кој им го посвети на штимерите на клавирот на кој тој прв пат настапи на Античкиот театар.

– Ми беше огромна чест да настапам со една таква музичка легенда како што е Михаил Плетнев од кого и ден денес учам и мислам дека имавме многу спонтан – пријателски однос на сцената, иако прв пат настапуваме заедно и имавме само една куса проба. Многу ми е драго што публиката не поздрави со голем аплауз.-изјави по завршувањето на концертот Симон Трпчески.


Покрај музичкиот дел публиката имаше можност да го проследи и театарскиот колаж составен од претстави кои биле изведедувани на Охридско лето, кој заврши со танчерско-егзибиционистички перформанс. По повод 50-от јубилеј кон небото беа пуштени балони со уметнички симболи и пораки, а свеченото отворање беше заокружено со скромен огномет.


До 20-ти август публиката на „Охридско лето“ ќе проследи 25 концерти, 13 театарски претстави, една балетска претстава и еден оперски гала-концерт, кои ќе бидат изведени на сцените на  Античкиот театар, црквата „Св. Софија“, Долни сарај, „Св. Јован Канео“ и Центарот за култура „Григор Прличев“.