Советот на општина Охрид в петок на 28 ноември со почеток во 11 часот ќе ги одржи 59-та и 60-та седница.
На 59-та седница советниците треба да го верификуваат престанокот на мандатот на советничката Билјана Балазоска поради неспоивост на функцијата советник и вработен во општинската администрација.
На дневен ред на 60-та седница се 15 точки. Членовите на општинскиот совет ќе расправаат по предлог одлуката за утврдување фискална стратегија и развојни програми на општината за 2009 година. На расправа ќе се најде извештајот од работата на јавното претпријатие „Охридски комуналец“ за првите шест месеци од годинава, како и деветмесечниот извештај на МЈП „Проаква“.
Неколку точки се однесуваат на трајна и времена експропријација, а на дневниот ред се и предлог одлуките за усвојување оперативна програма за организирање и фуникционирање на зимската служба на подрачјето на Охрид, приградските и селските населби, за пренесување на правото на користење на недвижен имот, за усвојување на Локален акционен младински план за Охрид, како и за измена на распоредот на средствата во Буџетот на општината за 2008 година.
Советниците треба да расправаат и да се произнесат и околу подигнување спомен обележје на Христо Узунов.
Ohridnews
