По реакциите во јавноста за проблемот за кој се говори години наназад дека странски туристички водичи ја интерпретираат охридската култура, историја и традиција на начин на кои нив им одговара, за што сведодачат професионалните водичи и здруженија од градот, но и граѓани кои биле сведоци на вакви настани, со реакција се јави Одделението за инспекциски надзор – инспекторат за туризам.  Тие ја отфрлаат констатацијата на Претседателот на здружението на туристички водичи „Кеј”, Климент Наумов дека честопати несанкционирано поминувале странските водичи водејќи туристички групи во Охрид, спротивно на одредбите од Законот за туристичка дејност.

 

Туристичката инспекција постапува строго согласно Законските овластувања и секогаш кога е затекнато лице кое води група без легитимација за туристички водич истото е санкционирано. Многу често постапуваме и по дојава од страна на локалните туристички водичи, а на лице место затекнуваме туристички водич кој не е од Охрид, но поседува туристичка легитимација за вршење дејност. Колку за потсетување регистарот на туристички водичи на РМ брои  1021 лице кои можат да водат групи на цела територија на РМ и многу често туристичките групите кои се организирани од туристички агенции имаат ангажирано лице туристички водич, согласно член 40 од Законот за туристичка дејност: „Туристичкиот водич мора да ги исполнува следниве услови, да е државјанин на Република Северна Македонија, да има најмалку средна стручна поготовка и положен стручен испит за туристички водич“ – се вели во реакцијата на Одделение за инспекциски надзор – инспекторат за туризам.

Во дописот од општина Охрид нема податоци дали евентуално, и колку казни се изречени за неовластено вршење дејност туристички водич на странски државјанин. Ова дотолку повеќе што реакцијата на локалните туристички водичи не се однесува на нелиценцирани домашни или странски туристички водичи, туку за начинот на интерпретирање на нашата култура, историја и традиција од страна на странските туристички водичи.

Спротивно на сите законски одредби од Законот за туристичка дејност се повеќе странски во улога на локални туристички водичи објаснуваат за охридската култура, историја и традиција на начин на кој што нив им одговара. Во неколку наврати самоиницијативно како здружение сме се организирале да им укажеме на нашите колеги од странство дека прават големи престапи при тоа барајќи ги службите од инспекторатите. Но, додека не биде некој казнат или бидат изведени на суд да бидат осудени по брза постапка овој проблем нема да се регулира.- истакна во изјава за OhridNews Преседателот на здружението на туристички водичи „Кеј”, Климент Наумов.

Инаку во објавениот текст кој беше повод за реакција на општинските служби, воопшто не станува збор за условите за добивање на лиценца за туристички водич, бидејки во истиот јасно е наведено дека „Нема нерегистрирани туристички водичи“.

 

Н.С.Ј.

Странски туристички водичи ја интерпретираат охридската култура и историја како што им одговара